得一知己死而無憾沖繩飄移夫婦

:0:0

男人一生中會有好多興趣，而又當中有好多都係女人不能夠明白：為隻Game個個月課金幾百？成千銀買隻Figure返黎鋪塵？幾皮嘢買部古董機影黑白相？對女人黎講呢啲就叫「曬錢」。要搵到一個唔反對你發展(要錢嘅)嗜好嘅女人已經難，如果要搵一個會被你感染而玩埋一份嘅女人就更加難！偏偏位於沖繩嘅飄移愛好者Alex就搵得到。

根據《Speedhunter》報導，Alex 於2003年接受一份合約工作而去到日本沖繩，一向愛車嘅佢因為跟朋友去參加一個活動而愛上飄移，於是自己砌咗部JZX100 Toyoya Mk II，甚至考到D1車牌、搵到當地贊助，展開飄移嘅生涯。可惜接住落黎日本經濟變差，作為合約員工嘅Alex首當其衝失去工作，被逼賣車。好在佢之後搵到長工，於是重燃飄移之心，搵黎一架Nissan Silvia S15，花兩年時間改裝成其飄移戰車。

首先佢於避震落功夫，用上Kei Office同Cusco嘅避震，加上Tein Super Drift減震器，提供一個極適合飄移，但又唔會令日常使用太辛苦嘅乘坐感。326 Power Knuckles(可調式支架)加大轉向角度，配上輕量嘅18x10吋 RAYS Gram Lights 57DR轉圈。副作用係會令前輪於轉向至最大角度時頂到前後水撥嘅兩個水糟，所以前水糟換成S14嘅單糟，後水撥成個移除。

至於動力方面，原本嘅2.0L Turbo引擎其實都算唔錯，但因為Alex原本部Toyota引擎有加大馬力，所以對佢黎講就唔夠喉。為此佢將Turbo換成Garrett GT2871R、加大前散熱、換上Splitfire點火線圈同火咀、750cc燃料噴射裝置、Yashio嘅鈦金屬排氣以及Haltech引擎管理兀電腦。結果就係得出大約400匹馬力，傳送到ORC Super 單離合器波箱同Nismo GT Pro-2way LSD差速器。內部就有Bride 賽車座位、Defi儀表、Nismo波棍以及上面有著名D1賽車手熊久保信重親筆簽名嘅MOMO軚盤。

如果你以為Alex最大嘅成就就係呢部飄移賽車，咁你就真係睇少咗佢。因為佢最大嘅成就係屋企有兩部飄移賽車，而且另一部係佢老婆Yurie嘅。正如所有汽車愛好者一樣，Alex都不停地同身邊嘅人「傳教」，而佢太太Yurie就當然首當其衝。不過有別於其他女人會嫌佢煩、話佢曬時間曬錢，Yurie竟然因此對飄移產生興趣，仲親自落場去學，甚至自己砌咗另外一部S15情侶車。

用上Blitz ZZ-R減震器，URAS車身部件、17吋 Origin Labo DRF-SR7輪圈、Blitz尾翼，Yurie嘅S15同樣有可調節嘅避震同可調式支架加大轉向角度。SR20DET引擎同樣用上Splitfire點火線圈、一個修復咗嘅Turbo，以及同Alex一樣嘅ORC Super 單離合器波箱同Nismo GT Pro-2way LSD差速器。