【沉睡20年】史上最「低咪」McLaren F1仲未搣膠紙

Photos: Tom Hartley Jnr Ltd經典汽車銷售公司Tom Hartley Jnr Ltd，近日有一部歷來最低累積行駛里數（俗稱「低咪」）嘅麥拿侖（McLaren） F1放售。 呢部1997年製造，生產序號060嘅Mclaren F1，配蒲公英黃色（Dandelion Yellow）車身同灰色內櫳，自製成至今，累計只行走咗239km。有說呢239km全部係未交付買家前嘅測試行駛里數，而買家亦未曾喺馬路駕駛過呢部車，亦冇登記出牌，換言之係：「齋儲廿年」，咁有冇定期換油或保養呢？Tom Hartley Jnr Ltd未有講明，但我相信買得咁貴嘅車，一定會錫住佢。 呢部黃色麥記另一焦點係，車主未有搣走包住中控台嘅膠膜，座位、軚盤嘅膠質保護套仲喺度，所有行李喼套裝，以至維修工具嘅包裝袋，仍然被原裝膠袋封住，部份仲有「McLaren」封條膠紙黐住。嘩！黐線架！完裝到咁！呢部車隨車附有F1 LM style排氣喉，額外購置嘅F1 GTR軚盤，右邊車身末端亦印有McLaren F1設計者Gordon Murray簽名，同埋一大堆精品，例如一枚TAG Hauer紀念版腕錶，總之就係正到唔使再多講咁幾錢呢？「P.O.A.」，你有興趣可直接問。俾少少參考資料你，今年有一部狀態極佳嘅McLaren F1，以1560萬美元成交，即約1億2168萬港元。呢部黃色新淨成咁，「一億到尾」真係唔出奇。希望你已經係富可敵國，又或者連中幾次大額六合彩金多寶啦。 祝閣下行好運！


[圖擷取自網路，如有疑問請私訊]

本篇	不想錯過? 請追蹤FB專頁!

喜歡這篇嗎？快分享吧！

前一頁 後一頁