真．香港人河國榮：「我只係一個臨記，觀眾好快忘記我,但我愛你地」

:0:0

sponsored 真．香港人河國榮：「我只係一個臨記，觀眾好快忘記我,但我愛你地」訪問當日不停落雨，叫河國榮淋住雨影相，足足淋咗半個鐘，河國榮都話冇問題，他說：「企多一個鐘都得。」唔怪得攞到「最受歡迎男歌星」！

《毛記電視分獎禮》全城喪追，河國榮攞香港區最受歡迎男歌星，兼喺台上唱〈香港地〉，一個澳洲鬼佬唱廣東歌，引起大家共鳴，網民已經當咗河國榮係真．香港人。入行 28年，河國榮從未得到過如此多掌聲。除咗上年套《死開啲啦！》，河國榮做親都係閒角。他說：「鬼佬做咩角色都可以，只不過啲編劇唔慣，全部一定要華人，同埋佢哋驚我除咗警司之外，我咩都唔識做。」sponsored 50歲河國榮除咗個樣係鬼佬，基本上同香港人冇分別，至少佢知咩叫洗版，亦同我哋一樣，唔係好清楚咩叫「一帶一路」。希望啲編劇同導演可以大膽啲，俾呢位自己友多啲機會啦！F：《 FACE》河：河國榮F：攞咗個香港最受歡迎男歌手有咩感覺？

河國榮同 MC仁唱〈香港地〉為全晚高潮之一，而河國榮更會快將推出新碟，他就話唔會有呢首歌，他說：「聽 CD做唔到呢種感受，同埋唔想令人失望。」sponsored 河：個獎搵啲保鮮紙包住咗，擺咗喺喇叭上面，因為屋企有 7隻狗、好多塵、怕污糟，又唔想收埋佢。我嘅心態係 do the work， accept the award do the work，攞咗獎開心一陣就擺低，再做嘢。觀眾可以好快忘記我，我唔介意，事實係咁，而家啲人好忙，日日都有新嘅新聞，點會記得嗰件事咁耐呢？F：而家多咗演出機會？河：廣告就有，拍戲就冇喇！ TVB以前我都有個⻆色係做代客泊車，西貢有個鬼佬揸小巴，鬼佬做咩角色都可以，只不過啲編劇唔慣，全部一定要華人，同埋佢哋驚話除咗警司，我咩都唔識做。好多編劇、導演都未當我係自己人，就算上年套《死開啲啦！》，林家楝都係因為識咗廿幾年先搵我，佢開頭都唔知我得唔得，之後開咗 3日工，佢先放心，識咗咁耐都擔心，何況唔識我嗰啲？所以我都明，但希望呢次之後，大家對我有同啲認同，其實香港鬼佬做咩角色都得㗎。sponsored F：你唱〈香港地〉驚唔驚被誤為港獨，影響北上發展？

上年《死開啲啦！》，河國榮多戲兼搶鏡，他說：「可能係唯一一次㗎喇！好多謝林家棟同導演梁國斌。」（網上圖片）河：少少驚，但都照唱。（賺少好多人仔喎？）我知，但照唱，首歌唔係話大陸唔好，只係支持香港人啫，香港有自己文化，語言係冇問題嘅，我係要支持㗎！sponsored F：身為澳洲人唱〈香港地〉，但又引起我哋共鳴，會唔會覺得好奇怪？河：我覺得係一種榮譽，唔係我攞返嚟，係香港人俾我，要香港人接受一個外來嘅人，係需要好多時間，你想做都未必做到，我不嬲當自己係香港人。〈香港地〉呢首歌我練習咗四百幾次，之前返澳洲慶祝媽媽 70大壽，家人住唔同地方，每日揸車都要兩、三個鐘，我就一邊揸車一路練點唱，我屋企人完全唔知我唱緊咩。F：你知唔知咩叫「洗版」同「一帶一路」？河：我知，洗版就係成個 facebook，都係講同一個題目，冇其他嘢，我講得啱唔啱呀？特首唔知呢樣嘢唔出奇，我估佢冇時間上網，唔知咩叫洗版囉！佢哋講關係，講關係係唔需要上網嘅。一帶一路？我知，佢講咗 42次，梗係唔明啦。F：無綫叫你返去做警司仲做唔做？sponsored

河：佢哋落後咗，大公司有自己文化，但想應變係難，佢哋唔識得應變，佢唯一分別係識得喺網上睇得到同埋出 app，但佢哋嘅節目同劇集，佢哋啲故仔，拍嘢方法係冇變過，新一代就唔係太鍾意呢啲嘢，我覺得佢面臨危機。佢唔會死嘅，咁大嘅公司，但佢要再風光就難囉。叫我返去做警司？如果有戲做嘅話就返去，如果一兩場戲就唔好喇，佢哋都有布偉傑啦，使咩搵我？sponsored