如果你身邊有一個好似「杜如風」既朋友，請你好好珍惜

:0:0

sponsored如果你身邊有一個好似「杜如風」既人，請你好好珍惜喺最近呢兩個星期，一到夜晚十點半，我就扭開大台睇佢主持嘅《關西攻略》。身邊嘅朋友，有人笑我重口味，甚至話遲早因為佢而精盡人亡；亦有朋友不解我迷上佢啲咩嘢──佢份人又大洗、炫富、講嘢慢半拍，又煩。當然有時睇佢成日都講自己再買嘢，佢同佢老豆個荷包就會大出血，又話啊媽會鬧佢敗家，就可以估計到佢平時嘅購物戰鬥力一定比我哋高出好多倍；但係唔計佢「大洗」呢個指控，你或者會慢慢發現杜如風呢種人，係一個值得結識，甚至交心嘅朋友──或者佢唔能夠永遠地兩肋插刀，但至少，佢唔會插你兩刀。

sponsored如果有睇開杜如風嘅節目，你都知道佢行為上係相對大癲大肺，接受唔到嘅人，會覺得佢係一個癲婆；不過呢樣正正係我不知不覺迷上佢嘅原因──因為佢呢種傻大姐性格嘅人冇乜機心，夠哂真性情。喺呢個爾虞我詐嘅社會入面，一個成年人仲依然願意顯示出佢最真實嘅一面，實屬難得；喺娛樂圈呢個大染缸入面，可以長期做到真我嘅一面，一啲都唔簡單，起碼佢成日被人批評呢樣嗰樣，都冇乜聽過有人話佢係偽人。不論乜情況，杜如風都係一個想做就做，隨心而行嘅人──佢可以因為想同佢嘅偶像梁朝偉影婚紗相，而選擇不丹做《風行全世界》入面其中一個目的地；又會因為感觸自己仍然冇個伴而忽然間眼濕濕；又唔會怕被人恥笑，而去做自己想做嘅事。係大台入面，你係唔會有咁多機會見到呢啲場面，因為班藝人可能為咗保持形象而就住就住，唯有杜如風先可以咁大膽。現實入面，你數下你身邊嘅朋友，你會發現好多時都會係你面前好似杜如風咁，做埋啲派膠嘅行為，講嘢又白白痴痴、不顧形象，反而通常都係同你關係最親密嘅朋友。sponsored

再睇睇佢過往嘅訪問同專欄，你會發現佢睇落去佢份人吊兒郎當，但做起事上嚟可以好上心。喺佢拍攝嘅時候，佢成日都因為唔同原因而進出醫院，亦有時會因為咁而影響拍攝進度。不過，就算佢病到入廠，佢都會擔心耽誤拍攝，竟然會叫導演到拍佢入院嘅情形，為咗教去旅行嘅遊客點樣入院！更甚者，佢可以夠膽死喺前一日因病得好犀利而被逼入院，第二日就為咗拍攝而出院！佢其實大可以因病而慢慢休息，等好番就再繼續拍攝，但佢就選擇為咗工作而頂硬上，可以睇到佢做事認真嘅一面。明知病咗，仲要死頂繼續做嘢，或者唔係一件值得學習嘅行為；但係如果你身邊人入面，當中有人有杜如風呢種專業精神嘅話，佢可以成為你嘅學習對象──去學識適當嘅時候要上心，同埋做人做事盡責嘅態度。sponsored

仲有，就係佢本來大可以利用老豆嘅名氣去發展自己事業，但佢除咗入行個刻係靠佢老豆（仲要係佢老豆同佢安排）之外，佢都係冇利用過佢老豆個名去發展自己事業，甚至要係自己出版嘅書大賣之後先肯公開相認。你可以批評杜如風係個大花筒，如果娶佢番嚟，遲早敗哂屋企成副身家；事實上，喺我哋成日話佢「世界級港女」嘅同時，似乎忽略咗佢自食其力嘅情神──至少佢買嘢拍拖都會用自己錢。更何況，比起王迪詩呢種成日貶低其他人（男性為甚）去抬高自己，甚至成日狗眼看人低嘅港女，杜如風又算係啲乜？話杜如風係「世界級港女」，其實係一個幾誇張嘅污名；難得嘅係，面對種種批評，杜如風仍然可以用一笑置之嘅態度輕輕帶過，亦都係我迷上杜如風嘅原因。sponsored